Categoría: <span>Berriak</span>

ALDAKETAK BB2021 TOPAKETAN!

Kaixo guztioi!

Azkenengo momentura arte zain egon gara baina, tamalez, jakinarazten dizuegu ostiralean Agurainen egingo den BB21Topaketa EGOKITU behar izan dugula, Covid-aren egoera dela eta.

Dakizuen bezala, Agurainek eremu «gorrian» jarraitzen du. Hau horrela izanda eta osasun gomendioak jarraituz, ekitaldia EGOKITU behar izan da, eta horrela geratzen da:

– Sari banaketa ekitaldia aurreikusita zegoen bezala Agurainen gauzatuko da baina, publiko barik, iaz Donostian egin zen bezala, eta streaming bidez jarraitu ahal izango da.

Beste guztia bertan behera geratzen da. Edozein kasutan, tailerrak, osasun egoera hobetzen denean ospatzeko konpromisoa mantentzen da. Espero dugu Aguraini ondo etortzen zaion momentuan egin ahal izatea.

19.00-20.30 SARI BANAKETA
Bea Clown, Libe Beitia eta Julen Portilloren eskutik
ETA KAI NAKAIREN KONTZERTUA!

Streaming bidez ikusteko aukera izango duzue EITBren lankidetzari esker, web orri honetan bertan.

 


24/11/21

SINOPSI LEHIAKETA 2021

BADUGU SINOPSI LEHIAKETAKO IRABAZLEA!

Eider Rakel Pertikak bidalitako testuak irabazi du lehiaketa: La decisión de Lucia. Peñascal Boluetabarriko OLHko Arotzeria Lehengo Mailako ikasleak dira testuaren egileak.

Irabazleek Kai Nakairen sinatutako bi disko eta Berexi Artek diseinatutako kamisetak jasoko dituzte azaroaren 26an Aguraineko Harresi Aretoan egingo den Beldur Barik 2021eko sari banaketan. ZORIONAK!

ZER DA SINOPSI LEHIAKETA???

Aurten ere bueltan da Sinopsi Lehiaketa urriaren 8tik 27ra. Bideoetan landuko dituzuen gaien inguruko lehiaketa bat da hau. Ba al dakizue zertaz hitz egingo duzuen bideoan? Ze gai landuko duzuen? 

Bideoaren argudioa argi baduzu: idatzi zure sinopsia eta parte hartu Sinopsi-Lehiaketan.

Ez baduzu argi: pentsatu, idatzi zure gidoi laburra eta parte hartu Sinopsi-Lehiaketan.

Ez bota ideiarik zakarretara, askotan burura datozkigun lehen burutazioak izaten direlako onenak. 

ZER EGIN BEHAR DUZU SINOPSI-LEHIAKETAN PARTE HARTZEKO?

Zure testuak lehiaketan sartzeko izan behar dituen irizpideak:

  • Beldur Barik jarrera erakusten duen testu bat izan behar da, hau da, kultura matxista eta indarkeria sexistaren adierazpenak eraldatzeko konpromiso pertsonal zein kolektiboa erakutsi behar du istorioak. Alegia, neska eta mutilek ezberdintasun egoerei nola egiten diegun aurre erakutsi behar duzu. 
  • Erakargarria eta ulergarria izatea.
  • Istorioan argi eta garbi garatzea indarkeria sexistari aurre egiteko modua.
  • Gehienez 200 hitz izan behar ditu sinopsiak.
  • Bidali zure testua komuniazioa@beldurbarik.eus  helbidera, «Sinopsi lehiaketa» edo «Concurso de sinopsis» gaiarekin.
  • Testua bidaltzeko epe-muga urriaren 8etik 27ra.

Urriaren 29an argitaratuko dugu irabazlearen izena gure sare sozialetan.

Saria: Berexi Artek diseinatutako kamisetak parte-hartzaile guztientzat eta Kai Nakairen bi disko oparituko ditugu azaroaren 26an Agurainen (Harresi Aretoa) egingo den Topaketan

Eta gogoratu garrantzitsuena BELDUR BARIK JARRERA erakustea dela.


02/11/21

ABANTO ZIERBENA BELDUR BARIK TOKIKO LEHIAKETA 2021

Abian da Abanto Zierbenako Beldur Barik Lehiaketa Lokala! Erakutsi zure Beldur Barik jarrera ikus-entzunezko pieza baten bidez, igo bideoa Youtubera edo Vimeora, bete webguneko formularioa eta irabazi!

Irakurri arretaz Abanto Zierbenako tokiko oinarriak esteka honetan klik eginez.

 

BIDEOAK AURKEZTEKO EPEA

Lehiaketara lanak aurkezteko epea 2021eko azaroaren 5ean amaituko da, 23:59an.

 

NORTZUEK PARTE HARTU DEZAKETE

1. kategoria: 2004 eta 2009 artean jaiotakoak (2021ean 12-17 urte betetzen dituztenak).

2. kategoria: 1995 eta 2003 artean jaiotakoak (2021ean 18-26 urte betetzen dituztenak).

Talde-lan batean parte hartzen duten pertsonen % 40 adinagatik goragoko kategoria batekoak direnean, goragoko kategoria horretan parte hartuko dute.

Lehiaketa autonomikoaren baldintzez gain, Abanto Zierbenako lehiaketan parte hartu nahi dutenek Abanto Zierbenan bizi behar dute edo bertan ikasi.

 

ABANTO ZIERBENAKO LEHIAKETAKO SARIAK

  • LEHEN KATEGORIAKO SARIA (12-17 urte)

Berdintasuna sustatzeko produktuak oparituko dira, «BERDINERATU/IGUALIZATE» proiektuaren babesean.

  • BIGARREN KATEGORIAKO SARIA (18-26 urte)

Berdintasuna sustatzeko produktuak oparituko dira, «BERDINERATU/IGUALIZATE» proiektuaren babesean.

 

TOKIKO EPAIMAHAIAREN EBAZPENA

Tokiko sarien lehiaketaren erabakia 2021eko azaroaren 25aren inguruan jakinaraziko da, Emakumeenganako Indarkeriaren Aurkako Nazioarteko Egunaren harira. Epai hori zuzenean jakinaraziko zaie irabazleei, eta udalaren webgunean argitaratuko da: www.abanto-zierbena.eus. Sariak emateko ekitaldi bat egingo da, eta horren data ohiko bideetatik argitaratuko da.

Tokiko lehiaketaren antolakuntza

Informazio guztia www.abantozierbena.eus helbidean eta telefono honetan:
94.636.20.00 Luzapena 102/116


27/09/21

Elkarrekin, sistemaren aurkako borrokan

Afrofeminas-ek idatzitako artikulua.

Bizitza askoz errazagoa izango litzateke niretzat, larruazala zuria eta ilea leuna izango banu? Hori da emakume beltzek geure buruari egiten dizkiogun galdera ugarietako bat arrazakeriari etengabe aurre egiten diogunean, begiradaz ongi etorriak ez garela jakinarazten diguten lekuetara sartzen garenean, lan bila gabiltzanean.

Orduan esaten digute: «Sukaldari lana eskaintzen dizugu, idazkaria bazara ere», «zure ilea lisatzen baduzu kontratatuko zaitugu». Eta azken batean esaldi tranpati hura entzuten dugu: «kontratatua zaude, beltz ederra zarelako, aurpegi finekoa. Ez duzu beltza ematen». Eta hor galdetzen diot neure buruari; zer da beltza izatea eta ez beltza ez ematen? Eta orduan erortzen gara sistema horretan, non ederra zuriarekin baizik ez den lotzen, non arrazakeria iraunkorra den, non gure edertasuna exotikoa besterik ez den, eta, batez ere, gure gorputz osoa aldatzeko nahia nagusitzen den, zuriaren irudira eta antzekotasunera moldatzeko nahia, neskatilak garenetik zahartzen garen arte.

Haurrak garenean, gure ilea desitxurosoa dela erakusten digute, gure ezpainek finagoak izan behar dutela eta gure sudurrek zorrotzagoak, gure azala ilunegia dela edo aldakak zabalegiak. Denborarekin ikasten dugu gure azala ez dela azal kolorea, eta tratu hobea jaso nahi badugu, ilea lisatzea komeni dela.

Una madre afrodescendiente peina el cabello a su hija.

Onartzen dugu, halaber, askorentzat onargarria dela Britainia Handiko enpresa batek bere panpina zuriak gure antzekoak direnak baino 10 euro garestiagoak saltzea erabakitzea, eta, era berean, onargarria da, arrazakeriari aurre egiteko ahaleginean, Espainiako postak aukeratzea zigilu merkeenak gure larruen antzekoak izatea, eta garestienak, argienak.

Azkenean ikasi dugu ez garela bakarrik gure lagun zuriak bezain eder eta erakargarriak, baizik eta bizi garen munduak erakusten digu, edertasun kontua ez ezik, balio kontua ere badela. Gure ezaugarriak, gure hazpegiak eta zentzu ezberdinetan emakume beltz gisa dugun nortasuna determinatzen duena, desatsegina bezala agertzen da, baina baita gutxiago pagina bezala ere, baliorik gabea bezala. Eta horrela marrazten dira gure istorioak alde horretatik, geure edertasuna eta balioa exotikoan eta arrotzean bakarrik ezagutzeko ahaltasunetik, zeren ematen baitu ederrak, baliotsuak eta aldi berean beltzak izatea erabateko kontraesana dela.

Horregatik da garrantzitsua gu berrezagutzea, gure jatorriaz eta sustraiez harro sentitzea. Garena besarkatzea, guztiari buelta ematea, iruzkinei eta propaganda arrazista eta matxistei buelta ematea, urteetan saiatu baitira garena gorrotatzen.

Geure burua ezagutzea geure burua onartzea da, ez gure irudikapen urria, ez gure ileari, larruari, sudurrari, ahoari eta gorputzari etengabe egiten dizkiogun isekak  barruan daramagun indarra eta ausardia murrizteko muga ez direla ulertzea da.

Geure burua ezagutzea berriz elkartzea da, gure hazpegiak aldatu eta nondik gatozen harro ez sentiaraztea nahi dutenei uko egitea da. Berriz ere gurekin adiskidetzea da, nola garen maitatzea da, zuria bakarrik ederra denaren sistema horretako parte izateko asmorik izan gabe.

Geure burua ezagutzea aurre egitea da, borrokarako prest egotea, eta, gure antzeko printzesekin edo protagonistekin istoriorik eta ipuinik ez badago ere, gu geure erreferenteak garela ulertzea da eta geure amak eta amonak geure heroiak.

 

Gaiarekin lotutako erreferentzia interesgarriak:


10/09/21

Bilgarritik haratago

A ze urtea…

Duela urte eta erdi norbaitek esan izan baligu 2021ean horrela egongo ginela, ez genukeen inoiz sinetsiko. Azterketei, lagunei, ligeei eta familiari konfinamendua eta urruntze sozialeko neurriak gehitu zaizkio. Nahikoa ez bagenu bezala!

Denbora honetan gauza asko aldatu dira, askok zuen logela ikasgela bihurtu behar izan duzue eta indarra batu azterketa beldurgarri horiei zuen kabuz aurre egiteko. Beste batzuek, hilabeteak antolatuta zeramatzaten planak atzeratu behar izan dituzue. Guztiontzat, konfinamenduak familiarengandik eta lagunengandik urruntzea ekarri du, eta pantaila baten bidez ikusi behar izan ditugu. Oso ondo dago sare sozialen bidez komunikatzea, baina ez denbora guztian. Egoera horren guztiaren erdian, errutinak aldatu egin dira, eta normala da ohitura berriak hartzea.

Photo by Christian Wiediger (Unsplash)

Askok elikadura ohiturak aldatu dituzte, beste batzuk kirol berriak egiten hasi dira, endorfinen subidoiarekin animatzeko. Batzuek urte oso batean baino lo gehiago egin dute, eta beste batzuek atseden hartzeko arazoak izan dituzte.

Lehen hilabeteetan, ikusteke genituen telesail eta film horiek guztiak ikusteko aprobetxatu dugu, zaletasun berriak hasteko, baina denbora igaro eta gero, nekatu egiten gara. Batzuetan, sare sozialak izan dira etxetik deskonektatzeko eta gainerakoekin konektatzeko modurik onena, baina baita segurtasun falta askoren gunea ere.

Zaila da bere irudia dirutan ordaintzen duen pertsona batekin alderatzea eta «gutxiago edo itsusiago»  garela ez sentitzea, eta are gehiago irudia erretokatuta dagoenean. Baina irudi hori irudi bat baino ez da. Hala ere, nire lagunengandik isolatuta nagoenean, konfinamenduaren argazkiak iragazkiekin bakarrik ikusten ditut, eta noski, nire burun bueltaka hasten da; erotzen ari ote naiz, hala lehen baino askoz itsusiago ikusten dut neure burua?

 

NORMALA DA

Egoera horren aurrean, normala da geure burua zaintzea eta dietan jartzea, «erretzeko» kirola egiten hastea edo produktu batzuk erostea. Kontsumitu ohi ditugun irudiak beti dira perfektuak, baina agi izan behar dugu ez dutela errealitatea islatzen. Gainera, fisiko bat baino askoz gehiago gara. Egunero lapsus, konplexu, beheraldi eta emozio pila bat bizi ditugu, eta batzuetan ahaztu egiten dugu hain garrantzitsua den zati hori, nola ikusten eta tratatzen dugun geure burua. Horregatik, hurrengo gakoak ekarri dizkizugu.

Photo by Lutchenca Medeiros (Unsplash)

Zeure burua zaintzeko pautak:

– Ikasi zeure gorputzari entzuten eta zurekin birkonektatzen. Horretarako, orainarekin berriz konektatzea eskatzen duen jardueraren bat egitea gomendatzen dizugu. Topera bazaude eta desborra gutxi baduzu, ‘Lojong’ aplikazioa gomendatzen dizugu, meditazio eta mindfulness dinamika ugari dituena. Gure gomendioa: ‘Camino’ programa.

– Ezarri zure mugak eta identifikatu ondo egiten dizuten eta gaizki egiten dizuten pertsonak. Ez dugu nahi txiki-txiki sentiaraziko gaituen edo garen bezala onartuko ez gaituen jenderik! Asko gara garen bezalakoak izanda.

– Seinalatu kosifikazioa. Gure gorputzak ez du zure onespenik behar! Mutilak beste neska batzuei buruz objektuak balira bezala hitz egiten ikusten baditugu, denok batera erantzungo diogu!

– Batzuetan ‘bajoiari’ aurre egiten mordo bat kostatzen zaigu, baina beti dago ondo gogoraraztea askotan gauzak ondo egiten ditugula. Gauero, lotara joan aurretik, hiru gauzatan pentsatzera animatzen zaitugu.
Batzuetan ahaztu egiten zaizu edo nagikeria ematen dizula? MoodSpace app-ak horretarako aukera ematen dizu eta askoz gehiago, ideia horiek hodeietan erregistra ditzakezu beste une batean berrikusteko. Horrez gain, zure pentsamendu negatiboak aztertu eta nola sentiarazi zaituzten aztertzeko aukera ere ematen dizu.

– Begiratu zure feed-a. Sare sozialetan ikusten duzunak eragin zuzena du zure gorputzaren pertzepzioan eta agian zure aldartean! Ziurtatu kontsumitzen dituzun edukiek ez dituztela edertasun-ideal eskuraezinak erreproduzitzen eta gorputz anitzak balioesten dituztela.

 


10/09/21

EMAKUMEON ORGASMOA(K). Abuztuak 8, Orgasmo Femeninoaren Nazioarteko Eguna.

Andrea Bosch Alfaro

Ordenagailuan idazten nabil, pozik eta liluratua. Hegazkin baten leihatilaren ondoan eserita nago, eta kristaletik begiratzen badut, kotoizko kapa handi bat aurkitzen dut nire oinen azpian. Zerua urdina baino ez da, eta eguzkiak hainbesteraino itsutzen du non begiek min ematen didaten begirada luzaroegi mantentzen badut. Beherago, askoz beherago, mendiak eta etxe ñimiñoak daude. Nire ustez, horietakoren batetik irakurriko duzue testu hau, eta sakonki espero dut zuen gustukoa izatea.

Gaur, abuztuak 8, Orgasmo Femeninoaren Nazioarteko eguna den honetan, gorputz honi, pentsamendu hauei, dagokien gaian pentsatzen dut: orgasmo femeninoa.

«Ez da oso desberdina hegazkin bat hartzea eta masturbatzea», esaten diot neure buruari, atzo bizi izan nuen momentu intimoa gogoratuz, neure gelan bakarrik masturbatuz. Hegazkinean sartu aurreko orduak, etxetik maleta eskuan duzula irteten zarenean, etxera pauso erabakigarriz joatearen antzekoa da, pentsatuz ohean etzango zarela, ateko kisketa botako duzula eta plazerez gora hegan egingo duzula.

Emakume baten eskua liburu baten tartetik ageri da, bulba irudikatu dezakegu buruan.

 

Nire lehen aldia neure buruarekin

Masturbatu nintzen lehen aldian 13 urte nituen. Gogoan dut nire familiari agur esan, nire gelan sartu, argia itzali eta maindire artean sartzea. Polita izan zen, baina errudun sentitzen nintzen eta ez nekien nora iritsiko nintzen. Bulba gainetik, behatzaren bat bagina barrutik, eta sentitzen ari nintzen plazerak arnasa geldiarazi ninduen. Orduan masturbatzeari utzi nion. Ikaratu egin nintzen eta ez nuen jarraitu.

Urtebete geroago hasi nintzen lagunekin hitz egiten eta nire konfiantza-zirkuluarekin esperientziak partekatzen.

Nire lagunekin sexualitateaz hitz egitea, nire esperientzia bakarretik hitz egiten ari naiz, ez baitu zertan berdina izan, nire gorputza erruz eta lotsaz bizitzetik salbatzea izan zen. Samurra izan zen eta, batez ere, dibertigarria izan zen gure artean genituen zalantza guztiak partekatzea.

Nire lehen sexu-heziketa institutuan jaso nuenean, 15 urte nituen eta modu anonimoan erantzun behar izan genuen masturbatzen baginen. Emaitza: 10 gizonetik 10 masturbatzen ziren, 10 emakumetik 2 bakarrik. Bere ondorioak aterako ditu bakoitzak, inoiz ez dut jakingo hori egia izan zen ala ez. Emakumeok lotsa handiagoz bizi genuen sexualitatea jendaurrean.

 

 Sexu-ibilbidea

Sexologiaren historia aztertuz gero, hamaika adibide jar ditzakegu emakumeen sexualitatea hain ikusezina zergatik izan den eta oraindik ere zergatik den ulertzeko, baina adibide bakar batekin nahikoa izango da ulertzeko: Antzinako Grezian homosexualitatea ondo ikusia zegoen, hau da, gizonek beren emazteak izan arren, ezin hobeto ikusita zeuden harremanak homosexualak. Baina ez harreman homosexual guztiak: gizonenak bakarrik. Emakumeen sexualitatea ez zen existitzen, eta baten bat onartuta bazegoen, prostitutena zen, gizonen nahiak asetzen zituena, nola ez.

Gaur egun oraindik ere, gizonekin sexualitateari buruz hitz egiten dudanean, gehienek elkarrizketa hipersexualizatzeko joera dute, eta emakumeekin, berriz, lotsa dagoela sentitzen dut, baina gero eta oztopo gutxiago ikusten ditut. Ondorioa: sexualitateari buruz hitz egitea konplexua da oraindik ere, eta hala izaten jarraituko du, baldin eta hezkuntzan sexu-hezkuntza integral eta transbertsal baten alde borrokatzen ez badugu.

Nire sexu-esperientzian, orgasmora iristeko helburu bakarrarekin sexu-harremanak izan dituzten pertsonak aurkitu ditut, gugandik espero zen hori barne-hartu eta onartu izan bagenu bezala. Baita orgasmoan hain zentratuta ez baina genitaletan bakarrik oinarritutako desio sexualak asetzea bilatzen zutenak ere.

Bada ere laztanez nire gorputzaren atal guztiak zeharkatu dituena, eta orgasmorik egon den ala ez, ez da aurrez pentsatua izan. Nire gorputzari ongi iruditzen zaio orgasmoa ez bilatzea sexu-topaketaren helburu edo helburu gisa, baina atsegin dut orgasmoa(k) edukitzea, plazer eta justiziagatik. Zergatik? Emakumeon sexualitatea eta orgasmoa askapena eta harrotasuna direlako.

Argi ezberdinekin 'Orgasm' hitza irakurtzen da.
Photo by Serge Kutuzov (Unsplash).

 

Laburbilduz:

  • Orgasmoak ez du zertan izan sexu-topaketaren helburu bakarra.
  • Nire sexu-esperientziaren kasu gehienetan, harremana amaitutzat ematen zen gizonak orgasmoa zuenean. Orain zorionez ez da horrela, kontzientzia handiagoa dugu eta feminismoa, berdintasuna, errespetua eta komunikazioa antzematen dira sexu-topaketetan.
  • Garrantzitsuena ez bada ere, eskubidez orgasmatzea aldarrikatzen dut, nahiko ikusezin izan dira orain arte gure plazer-oihuak.

Nork bere gustu eta lehentasun sexualak aurkitu eta ulertzea da sexualitatearen biderik politena. Ederra da gorputzak zein ezberdinak diren eta bakoitza zein ezberdinak garen deskubritzea.

Gora orgasmoak eta gora errespetuzko sexu-topaketak!

Mugarik gabe, patroiei jarraitu gabe eta gorputzak une bakoitzean eskatzen diguna entzuten.

Gora gu! Gora emakumeon orgasmoak!

 

GAIAREKIN LOTUTAKO LOTURA INTERESGARRIAK:

Liburuak:

Bideoa:

Jolas erotikoak:

Temazoak:


10/09/21

Ziberfeminismoetan nabigatzen, urik gabe?

Sare-sozial digitaletan, beste armiarma sareetan bezala, espazioak hartu edo agian espazioak pairatu egiten ditugu, biak zilegi dira.

Erredakzioa: Emoki Elkartea.

Sare sozialen ikonoen irudia
Argazkia: Brett Jordan (Unsplash).

Hasteko, feminismoen eta ziberfeminismoen artean berdintasun batzuk daudela argi dago. Baina, gaurko honetan desberdintasun batzuk daudela argi izatea komenigarria dela iruditzen zait. Zeozer bidaltzerakoan nik ezin izango dut kudeatu noraino helduko den informazio hori guztia eta are gutxiago besteek eduki horrekin zer egingo duten. Bestalde, elkarrizketak izaterakoan gaizki ulertuak egotea errezagoa da eta pertsonen arteko kontrola areagotu daiteke (app eta sareak haien pribatasunaren konfigurazioagatik ez dute komunikazio osasuntsua ahalbidetzen). Gainera, komunitate askotan espazio seguruak topatzea zaila edo ezinezkoa izaten da eta feminismoekin lotura duten kritikekin eta indarkeriarekin inpunitate handia dago, hau da, nahiz eta neurri batzuk dauden jarrera batzuk zigortzeko eta jokaera eta portaera batzuk denuntziatu daitezkeen, benetan ez dago laguntza handirik. Kontu askok zabaltzen duten informazioa diskrimatzea zaila izan daiteke eta orokorrean emakumeen gorputzak, erotikak eta jokabideak behin eta berriro kolokan jartzen dira.

Badirudi Internet eta Sare-sozialetan feminismoak bizitzeko modu asko daudela eta gure burua zaintzen ikastea hainbat ikasgai bezain garrantzitsua dela ahaztu ditzakegu, hau da, autozaintzaren bidea egitea. Ziberfeminismoan murgiltzean: mezuak, bideoak, milaka sare desberdin eta eduki anitzaren artean nabigatzean, emozio edota sentimendu desberdinak azalarazten dira eta sentitzen ditugun guztiak lekua behar dute, horrela gu geu balioztatzen garela ahaztu barik.

Argazki bat igotzean, iruzkin bat idaztean, iritzia ematean, iritzirik ez ematean, nire erotika mezu eta argazkiak elkartrukatuz disfrutatzean, nire “balore” eta “ideiekin” bat ez datorren edukia ikusi eta disfrutatzean, segurtasun eza edukitzean, igotzen ditudan gauzak igotzerakoan, besteen iritzia zein izango den pentsatzean, nire burua konparatzean eta milaka aukera gehiagotan nire emozioak eta sentimenduak oso desberdinak izan daitezke. Gutako bakoitzak sentsazio desberdin bat izango du, baina horrek indarra har dezake interneteko mounstroak duen eraginarekin.

Espazio hauen bidez areagotzen den edo diren emozioak, sentimenduak eta sentsazioak transitatu beharra dago. Eta, transizio honetan zertaz elikatu nahi dugu gure burua?

Pertsona bat ordenagailuarekin
Towfiqu Barbhuiya (Unsplash).

Nolabait gure lekua bilatzen saiatu beharko dugu, leku horretaz nekatu gaitezkela kontutan izanez eta iritzia aldatzea posiblea dela eta ez dela ezer gertatzen. Ondo legoke autozaintzan fokoa ipintzen badugu eta autoaintza hori bakoitzarena eta bakarra izango da, bakoitzak behar duen neurrira eraikia eta egina. Hona hemen gustura hartzeko edo ez hartzeko, lagungarriak izan daitezkeen ideia batzuk:

  • Kontu batzuk jarraitzea mina ematen badit, jarraitzeari utzi dezaket. Agur!
  • Nire edukia ezabatu dezaket, agian ez naizelako eduki horrekin identifikatzen jada. Garbigunera!
  • Kontutan hartu sare-sozialak modu konpultsiboan erabiltzeko diseinatuta daudela. Adi!
  • Nire erotika disfrutatzeko eskubidea daukat, presiorik gabe! Gozatu!
  • Argi eduki sare-sozialetan: mina, nekea, deserosotasuna, asperdura edo tristura sentitzen badugu, agian guretzako osasuntsua ez den edukia aukeratzen ari garela. Sentitu!
  • Gure laguneekin edozein arazo edo zalantza partekatu! Lagundu!
  • Inspiratu eta kitxikagarriak diren espazioak, kontuak eta edukia bilatu eta disfrutatu!
  • Eta sareak diren itsasontzian nabigatzen dugun bitartean, non dago ura?

Instagrameko kontu feministak

Ura gu gara, gure hurbilekoak dira, ura sentitzea da, ura beste emakumeekin inspiratzea da, ura sororitatea sentitzea da, ura lagun feministekin indarra eta ahalduntzea sentitzea da, ura hurbilekoen besarkada da, ura zaintza erdigunean jartzea da eta ura garen bezalakoak eta aske izateko bidea egitea da.

Beraz, uretara goaz?

Hementxe, inspiraziorako eta eduki interesgarriak sortzen duten emakume batzuk, gehienak sare-sozialetan topa ditzakezu:

Liburuak:

  • Feminismo para principiantes
  • El segundo sexo
  • Teoría King Kong
  • Una habitación propia

27/07/21

MOOD: NEKATUTA!

Denbora da koadrilako, klaseko edota inguruko beste mutilekin denbora pasatzen dudanean, askotan, ez naizela oso eroso sentitzen eta horrek zer pentsatu ekarri dit azkenaldian.

Ni txikitatik mutilen koadrilan egon naiz eta neska lagun asko baditut ere, mutilekin ibiltzen naiz gehienetan. Egia esan, ez dakit zergatik. Ohituragatik izango da edo nire lagun minenetako bat mutila delako…? Honen inguruan ere ez dut asko pentsatu egia esan!

Dena dela, txikitako lagunarteko oroitzapen onak baditut ere, azkenaldian ez naiz oso eroso sentitzen koadrilako edota beste koadrila bateko mutilekin. Ez da gaizki erortzen zaizkidalako. Betidanik ezagutzen gara eta! Baina, sentsazioa daukat presio bezalako bat dagoela koadrilan gauzak modu baten egiteko edo besteen aurrean jarrera mota batzuk izateko.

Un chico mira al horizonte en el mar.
Photo by Davyn Ben on Unsplash.

Adibidez, futbolean edo beste kirolen batetara gabiltzanean, nahiz eta lagunarteko partida bat izan, sentitzen dut Champions-eko finala izango balitz moduan jolasten dugula. Sarrera itsusiak eta guzti izaten dira askotan! Gainera, onena izan behar zara! Eta ni bezala, futbolean nahiko kaskarra bazara, edo inork ez dizu kasu egiten edo zuzenean baneatzen zaituzte. Eta zer nahi duzu(e) esatea, niri behintzat ez zait gustatzen nonbaiten ongietorria ez izatea.

Fisikoki ere denok “mamadísimos” egon behar garela ematen du. Nik horretan zortea daukat, izan ere nahiko gihartsua naiz eta ez daukat esfortzu handirik egin behar hori horrela izateko. Baina inguruan gihartsuak ez diren eta meheagoak diren lagunek jasaten dituzten mespretxuak asko entzuten dira.

Guzti honekin ematen du mutilon artekoa lagunarte bat izan beharrean, lehiaketa bat dela. Ea nor den onena futbolean, ea nork dituen abdominal gehien, nork ligatzen duen gehien… Nik honetara ez dut nahi jolastu. Nik lagunekin ondo pasa nahi dut eta ez lehiatu!

Horretaz gain, askotan, lehia ez dagoenean eta gure artean ondo eramaten garenean eta  koadrila batu bat garenean, badaude batzuk M.D.L.R. rolloan jartzen direla eta inguruko koadrilei (gehienetan txikiagoak edota neskak) molestatzen hasten direla. Nik holakotan oso gaizki pasatzen dut, ez zait batere gustatzen rollo hori, kriston paloa ematen dit. Gainera, ezin dut ezer esan. Zerbait esaten dudan bakoitzean ni naiz molestatzen dutena eta nire kontra jartzen dira. Holakoetan hasten dira gainera jarrera batzuk zeintzuk guztiz inkomodatzen nauten: joko nautenaren amagoak, “brometako” mehatxuak…

Inguruko mutilak “de calle” jarrera horretan jartzerakoan botatzen dituzten erronkak egitea nahi ez dudanean, dela beldurra ematen didalako, gaizki dagoela uste dudalako edota lotsa ematen didalako, “marika” edo “maricón” deitzen didate. Baita neskekin egotea erabakitzen dudanetan edo “neskentzako gauzak” egiten ditudanean. Zergatik deitzen didate “marika, maricón” neskekin zerikusia daukan zerbait egin edo esatean? Edota zergatik irain horiek? Akaso gay izatea beldurti bat izatea al da? Eta zer beldurtia banaiz? Eta zer gay banaiz? Agian banaiz! Edo ez. Baina behintzat noizbait mutilak gustatzen zaizkidala konturatzen banaiz, ez nuke horregatik lotsa edo beldurra sentitu nahi.

Una cuadrilla hablando
Photo by Eliott Reyna on Unsplash.

Azken honek gogoratu dit ere mutil lagun min bakarra daukadala inguruan. Gure arteko laguntasuna ez da gure arteko konpetizio eta kolpeen artean ematen. Gure arteko laguntasuna, nola sentitzen garen kontatzen, etxean izaten ditugun bronka ostean elkarri audioak bidaltzen, elkarrekin barreak botatzen edota aurpegira begiratuta zerbait ondo ez doala jakitean ematen da. Asko gustatzen zaidan laguntasuna da eta egia esan, pena ematen dit beste mutil batzuekin horrelako laguntasuna sortzeko zailtasunak izatea.

Azken baten, hemen kontatu dudan guztiarekin, batzuetan iruditzen zait mutila izatea eta mutilen artean aritzea kartzela bat dela eta “mutilen gauzak” egiten ez badituzu, zigorra jasotzen duzula.

Hau bada mutil izatea, nik ez dut nahi mutil izan edo behintzat beste modu bateko mutil bat izatea gustatuko litzaidake. Hasieran esan dudan presio hori sentituko ez duena, mutil erlaxatuago bat izango dena.

Chico posa ante la cámara con una camiseta que dice:
Photo by Xandtor on Unsplash.

13/07/21

LIGATZEKO PREST? EZ GALTZEKO GAKOAK

Zer da ligatzea? Zertarako ligatzen dugu?
Zer bilatzen dugu ligatu nahi dugunean? Erraz ligatzen dugu ala kosta egiten zaigu?
Zeintzuk dira gure erreferenteak ligatzeko orduan?

Prest zaude ligatzeko? Claves para no perderse. Taller dirigido a chicos de entre 12 y 26 años.

Galdera horiek bota dituzte Peio Saez de Lafuente eta Javi Molina sexologoek 12 eta 26 urte bitarteko mutilei zuzendutako online izan den ligoteo tailerrean.

Ez galtzeko gako batzuk aipatu dituzte eta hemen azpian dituzue irakurgai. Gozatu!

 

Gure desioaren garrantzia.

Nik ez badut argi zer nahi dudan, nola egingo diot aurre nire desioa beste norbaiti planteatzeko egoera horri?

  •  ‘Pertsona batengana hurbiltzen naizenean… lagun taldeko arraroa ez geratzeko egiten dut, lagunek presionatzen nautelako, edo pertsona horrek benetan erakartzen nauelako eta gerturatzeko gogoa dudalako egiten dut?’
    Funtsezkoa da galdera hau egitea hurbilketa bat egin aurretik.
  •  Betidanik gizon heterosexualoi ez digute gure emozioak adierazten irakatsi, gizon ‘ahula’ izatea esanahi zuelako horrek. Gaur egun ere, kostata aldatzen ari gara emozioen kudeaketa hau. Oraindik ere emozioak gure amari eta bikotekideari bakarrik adieraztea izaten da ohikoena, eta, beraz, oso zaila egiten zaigu askotan gutxi ezagutzen dugun pertsona bati gure desioa adieraztea.
  • ‘Eta orain zer egin behar dut? Zer esan behar dut?’ Oso deseroso sentitzen gara beti zalantza horrekin. Galdetu iezaiozu zeure buruari lehenbizi: ‘Zer nahi dut? Zergatik nago hemen? Zeren bila nabil? Bikote harreman bat nahi dut? Norbaitengana hurbildu eta jolastu nahi dut?’. Oso garrantzitsua eta funtsezkoa da norbaitengana hurbiltzen naizenean zergatik egiten dudan jakitea.
  • Nire nahiak adierazteko legitimitatea dudala sentitu behar dut, eta hori ere nire betebeharra da, besteak ezin baitit pentsamendua asmatu. Baina, nire desioak adierazi aurretik argi izan behar ditut.
  • Kontuz! Izan ere, askotan hain kezkatuta gaude gurekin fijatu daitela, ezen batzuetan zalantzan jartzen baitugu pertsona hori benetan gustatzen ote zaigun. Bestearen onespenari garrantzia handiegia ematen diogu batzuetan, eta ahazten zaigu hor egon nahi dugun ala ez.
  • Beste batzuetan hain sartuta egoten gara gure pentsamenduan, ez diogula jaramonik egiten beste pertsonari, haren seinaleei. Ligatzea ez da prozesu indibiduala, bi pertsona edo gehiagoren artean ematen den prozesu komuna baizik.

 

Beste pertsonaren seinaleei arreta jarri.

Nire nahia oso argi dudanean, batzuetan gertatzen da besteak ez duela nitaz ezer jakin nahi. Baina argi izan behar dut ezin dudala bestea hitz zehatz batzuekin konbentzitu. Desioa oso pertsonala da eta unearen araberakoa.

  • Lehen hurbiltze horren aurretik, oso garrantzitsua da beste pertsonaren seinaleei arreta jartzea, eta ez hainbeste esango dudanari, nola esango dudan, barregarri geratuko naizen, eta abarrei. Aterantz begiratzen badu etengabe, edo begiratzen ere ez bagaitu, ziur aski ez du gutaz ezer jakin nahi.
  • Behin hurbilketa eginda eta beste pertsona guri arreta eskaintzeko prest dagoela ikusita, garrantzitsua da bere itxaropenak edo nahiak zeintzuk diren ikusten joatea, horretaz konturatzea.
  • Pertsona horrengana hurbildu eta gustuko duzula planteatu baino lehen, funtsezkoa da nolabait beste modu batera insinuatzea; begirada, irribarre edo keinu batekin. Gerturatu aurretik pertsona horren feedback bat jaso ahal izateko modu bat da, eta horrela geure burua babestu dezakegu pixka bat mingarriagoa izan daitekeen aurrez aurreko ezezko bat ekidinez.

 

Ezetzari beldur

Arbuioari beldurra inoiz gaindituko ez dugun errealitatea da.

  • Oso garrantzitsua da onartzea ezetz esaten digutenean ez digutela geure pertsonari ezetz esaten. Batzuetan uste dugu gure kulpagatik uko egiten digutela, gure errua dela pentsatzen dugu eta horregatik zigortzen dugu geure burua. Baina ezetza ere kudeatzen ikasten da, entrenamendua da ezetza modu osasuntsu eta natural batean onartzea.
  • Jasoko dugun mina ere desberdina da egun konkretu batean festaren batean  adibidez ezagutzen dugun pertsona bat bada, edo duela denbora dexente ezagutzen dugun pertsona bat bada. Gaitzespena ondo kudeatzen jakitea funtsezkoa da gehiegi ez sufritzeko eta beste pertsonari kalterik ez egiteko.

 

Ni eta nire lotsak.

Arbuioaren beldur horretan lotsa sartzen da jokoan, nahiz eta gure izaeragatik berez pertsona lotsatiak izan gaitezkeen.

  • Pertsona batengana gure sentimenduak erakustera lehen aldiz hurbiltzen garen bakoitzean, nolabaiteko deserosotasuna egongo da. Baina, ‘zenbat deserosotasun gainditzeko prest gaude?’.
  • Funtsezkoa da gure ahuleziak eta akatsak ezagutzea eta onartzea. Perfekzioa ez da erakargarria.
  • Naturaltasuna eta lotsa-falta nahastu ditugu askotan. Baina, zure lotsarekin, zaren bezalakoa erakusten bazara, gauza politak atera daitezke.
  • Norbaitengana hurbildu zaitezke eta esan: ‘Kaixo, gauza hauek lotsa handia ematen didate, baina asko gustatzen nauzu’, adibidez. Erabili lotsa, ez ezkutatu. Izan ere, hori bai dela zaila, izan ere,  hiru lan egin behar dituzu: lotsa izatea, alde batera uztea eta ezkutatzea.
  • Ez da ezer gertatzen traketsa izateagatik, ez da ezer gertatzen lotsa sentitzeagatik.
    Baina kontuz! Ez da gauza bera baldarra izatea eta oldarkorra izatea; baldarra izanez gero, gauza batzuk aldatzearekin nahikoa da. Oldarkorra bazara, agian zugan interes handirik ez duen pertsona baten espazioa inbaditzen ari zara, eta are gutxiago erakarriko duzu horrela.
  • Gure ahultasuna nola erakusten dugun da giltza.

 

Ez dago ligatzeko modu unibertsalik

Ligatzeko erantzun magiko bat dagoela uste baduzu, ez da egia.

  • Norbaitekin hitz egiten duzunean, ez da hainbeste ongi edo gaizki esan dituzun gauzak. Garrantzitsuena hauxe pentsatzea da: ‘Nire adierazpidea ona izan dela uste al dut?’.
  • Ligatzeko orduan, helburu finalari erreparatzen diogu gehienetan eta ez hainbeste prozesuari. Funtsezkoa da ligatzeko prozesuan parte hartzen duten pertsona guztiek, hain zuzen ere, prozesu horretaz gozatzea; jolastea, pixkanaka bata beste gehiago ezagutzen joatea, iradokitzea, erotika hori bilatzea… Helburua oheratzea bada eta elkarrizketa ‘txapa’ bat izan bada, gaizki goaz.
    Ligatzean gozatzen dugun ala ez, gure helburua non jartzen dugunaren araberakoa da. Adibidez, gailurrera iristeko mendira joaten banaiz, eta garrantzitsuena tontorrera iristea bada, ez dut urik hartzen eta ez dut ezer eramaten, garrantzitsuena lehenbailehen iristea baita. Orduan bat-batean euritan hasten bada eta buelta erdia eman behar dut, kasu horretan zorigaiztoko eguna izango da mendian. Aldiz gure xedea paseoaz gozatzea bada, hor ez du axola tontorrera iritsi ez izanak. Gauza bera gertatzen da ligatzeko prozesuarekin.

06/07/21

EKAINAK 28, LGTBI PERTSONEN ESKUBIDEEN NAZIOARTEKO EGUNA

28/06/21